سياسة خصوصية خمسة لعب

آخر تحديث: 5 أكتوبر 2026. المسؤول عن اللعبة: Anubis Studio (حسام جمال). للتواصل: support@anubisstudio.net

السياسة دي بتشرح البيانات اللي لعبة «خمسة لعب» بتستخدمها على Android وiOS، وليه، ومين بيشوفها، وإزاي تمسحها.

الحساب والدخول

الدخول كضيف: أول ما تفتح اللعبة بنعمل لك حساب مجهول في Firebase Authentication (معرّف تقني من غير إيميل ولا رقم تليفون)، واسم مستخدم ثابت بصيغة khamsa_##### عشان صحابك يلاقوك والإدارة تميّز الحسابات.
ربط حساب Google أو Apple (اختياري): لو ربطت حسابك، مزوّد الدخول بيبعتلنا معرّف الحساب والاسم والإيميل اللي انت وافقت تشاركه. بنستخدمهم بس عشان تقدّمك ومشترياتك ما يضيعوش لو غيّرت الموبايل.
باسورد للحساب «احمِ حسابك» (اختياري): لو عملت باسورد لحسابك عشان تدخل بيه من موبايل تاني باسم المستخدم بتاعك، بنحفظه على سيرفرنا متشفّر بطريقة ماتترجعش (scrypt) — مش الباسورد نفسه، ومش مربوط بأي إيميل. وعشان الحساب مايبقاش مفتوح على موبايلين في نفس الوقت، بنحفظ بصمة الموبايل المشفّرة اللي حسابك مفتوح عليه ووقت الدخول، ولما تدخل من موبايل تاني بنخرّج الموبايل القديم. وبنعدّ المحاولات الغلط لكل اسم مستخدم وموبايل لفترة قصيرة عشان نحمي حسابك من التخمين. كل ده بيتمسح لما تمسح حسابك.
ملفك في اللعبة: الاسم اللي تختاره، والشخصية والإكسسوارات، والنقط والأوسمة والإحصاءات، ورصيد الكوينز، ونوع الدخول (ضيف أو Google أو Apple) وده بنستخدمه في أعداد مجمّعة بس، ورمز الدولة المضبوط في إعدادات المنطقة على موبايلك (زي EG). بنستخدمه في أعداد مجمّعة، ولو شغّلت «اعرض بلدي للاعيبة» اسم بلدك بس (مش المدينة) بيظهر للي بيلعبوا معاك، وبيتشال لما تقفله. مش بنحدد موقعك من GPS.

اللغة

اللعبة بالعربي والإنجليزي. أول مرة تفتحها بتختار اللغة (أو «تلقائي» على لغة موبايلك)، وتقدر تغيّرها من الإعدادات ← «اللغة».
لو اخترت الإنجليزي، بنسألك مرة واحدة «بتقرا عربي؟» عشان نعرف نعرض لك باقات الأسئلة العربي ولا لأ.
بنحفظ اللغة وإجابة السؤال ده مع حسابك عشان الإشعارات اللي بتوصلك من السيرفر تبقى بلغتك، وتتمسح مع حسابك. ولغة الواجهة كمان بتدخل في عدّاد الاستخدام المجهول (من غير أي معرّف).

اللعب أونلاين والشات

الأوض: لما تفتح أوضة أو تدخلها، اسمك وشخصيتك وإجاباتك ونقطك بتتحفظ في Firebase Realtime Database وبتظهر للي معاك في نفس الأوضة. الأوضة اللي صاحبها يخليها «مفتوحة» بتظهر في «قعدات مفتوحة» لأي لاعب لحد ما اللعب يبدأ.
الغرف اللي حواليك (بلوتوث وواي فاي): الخيار «خلّي اللي حواليك يشوفوها» مقفول من الأول: قبل ما تشغّله بنفسك في لوبي أوضة انت فاتحها، الموبايل مابيعلنش أي حاجة (ولا حتى اسمك) ومابيطلبش إذن البلوتوث ولا الشبكة المحلية. لما تشغّله، الإذن بيتطلب مرة واحدة، والموبايل بيعلن للموبايلات اللي جنبك (على نفس الواي فاي عن طريق Bonjour/NSD، وبالبلوتوث) كود الأوضة واسمها ونوع اللعبة واسمك وشخصيتك وعدد اللاعبين بس — من غير أي معرّف ليك ولا إيميل. الإعلان بيقف أول ما تقفل الخيار أو اللعب يبدأ أو الأوضة تتقفل أو تتملي أو تخرج من اللعبة. ولما تفتح بنفسك «الغرف اللي حواليك» الموبايل بيسمع بس (والإذن بيتطلب ساعتها)، ومش بنستخدم البلوتوث ولا الشبكة في تحديد مكانك ولا بنتصل بأي جهاز.
لينك الغرفة بعد التسطيب: لو دوست «تحميل» من صفحة لينك غرفة، الصفحة بتنسخ لينك الغرفة في الحافظة، ولينك Google Play بيشيل كود الغرفة (Install Referrer). أول مرة بس تفتح فيها اللعبة بعد التسطيب، بتدور على كود الغرفة ده (على iPhone بعد ما تدوس «دخّلني»). لو الحافظة فيها حاجة تانية مش لينكنا، مابنستخدمهاش ولا بنحفظها ولا بنبعتها لأي حتة.
الشات والملصقات: رسايل الأوضة والرسايل المباشرة بين الصحاب بتتحفظ عشان توصل للي بتكلمه. ما تكتبش بيانات خاصة في الشات.
شروط المحتوى: قبل أول رسالة أو مشاركة، بتوافق مرة واحدة على شروط المحتوى، وبنحفظ نسخة الشروط اللي وافقت عليها ووقتها.
فلتر الكلام: الرسايل وأسامي اللاعيبة والأوض وإجابات «فضفضة» بتعدّي على فلتر آلي للشتايم على سيرفرنا. الكلام المرفوض مابيتنشرش، وبنحفظ نسخة منه وعدّاد المخالفات مربوطين بحسابك عشان المراجعة ومنع الإساءة، وبيتمسحوا مع حسابك.
الصحاب والمتابعة: طلبات الصداقة وقائمة صحابك واللي بتتابعهم ويتابعوك، وحالة «متصل» وانت فاتح اللعبة.
صفحتك العامة والترتيب: اسمك وشخصيتك وأوسمتك وعدد متابعينك ونقطك بتظهر في صفحتك العامة جوه اللعبة وفي الترتيب العام وبطولة الشهر.
Google Play Games وGame Center: لو موبايلك داخل على Google Play Games (أندرويد) أو Game Center (آيفون)، اللعبة بتنسخ أوسمتك كإنجازات، ومجموع نقطك وعدد إجاباتك الصح للوحات الترتيب هناك. Google وApple بيعرضوا اسمك على المنصة دي في اللوحات حسب إعدادات الخصوصية بتاعتك عندهم. إحنا مش بنستقبل معرّف اللاعب بتاعك هناك ولا بنحفظه على سيرفرنا، وتقدر تقفل ده من إعدادات Play Games أو Game Center على موبايلك.
البلاغات والحظر: لو بلّغت عن لاعب أو رسالة أو سؤال أو باقة، بنحفظ البلاغ ومحتواه عشان نراجعه. ولو حظرت لاعب، بنحفظ الحظر عشان ما يوصلكش منه حاجة.

الميكروفون والتسجيلات الصوتية

الميكروفون بيشتغل بس لما انت تدوس تسجّل، وبعد إذنك:

«غنيها بالعكس» على موبايل واحد: التسجيل بيتعالج على موبايلك وما بيترفعش.
«غنيها بالعكس» أونلاين، والرسايل الصوتية في شات المافيا: التسجيل القصير (لحد 12 ثانية في الغُنا ولحد 30 ثانية في الرسالة) بيترفع على Firebase Storage عشان اللي معاك في الأوضة يسمعوه. مش بنستخدمه في أي حاجة تانية، ومش بنعمل عليه تعرّف على الصوت. تقدر تطلب مسحه من support@anubisstudio.net
الرسايل الصوتية (الفويس) في الشات: في شات الأوضة وشات صاحبك، الفويس (لحد 30 ثانية) بيترفع على Firebase Storage عشان اللي في الأوضة دي يسمعوه (أو صاحبك، في الشات الخاص)، ومش متنشر في أي مكان عام. بيتمسح لوحده بعد 24 ساعة (وكمان تسجيلات «غنيها بالعكس» والمافيا). تقدر تبلّغ عن أي فويس من زرار «بلّغ» على الرسالة، والبلوك بيخفي فويسات اللي بلّكته.

الصور والأسئلة والباقات اللي بتألفها

لو ضفت صورة لغلاف باقة أو لسؤال، بتختارها انت من مكتبة الصور، وبنرفع نسخة JPEG صغيرة على Firebase Storage. الصورة بتفضل خاصة بيك لحد ما نوافق على الباقة أو السؤال.
أي سؤال أو باقة أو نسخة جديدة منها بتتبعت للمراجعة الأول. بنحفظ المحتوى ومعرّف حسابك وتوقيت الإرسال وقرار المراجعة وملاحظاته. مفيش حاجة بتظهر للاعبين قبل الموافقة.
بعد الموافقة، السؤال أو الباقة بيظهر للاعبين باسمك الظاهر في ملفك، وبنحفظ أعداد اللعب والشراء عشان مكافآت المؤلفين.
بنستخدم حدود إرسال وبصمات تقنية للمحتوى عشان نمنع التكرار والسبام.

صورتك الشخصية («زيّن صورتك»)

لو اشتريت «صورتك الشخصية» أو «باقة VIP»، تقدر تختار صورة من مكتبة الصور تبقى مكان شخصيتك. الموبايل بيصغّرها لنسخة JPEG صغيرة وبيبعتها لسيرفرنا، والسيرفر بيحفظها في Firebase Storage مربوطة بحسابك.
كل صورة بتتراجع من الأدمن الأول. وهي مستنية المراجعة بتفضل في مكان خاص محدش يقدر يفتحه غير الأدمن، وانت بس اللي بتشوفها على موبايلك مكتوب عليها «مستنية المراجعة».
بعد الموافقة، الصورة بتظهر للاعيبة اللي داخلين اللعبة بس (في الأوض والشات والنتايج وصفحتك)، واللي عاملك بلوك مش بيشوفها. تقدر تبلّغ عن صورة أي لاعب بسبب «صورة مش لايقة».
الصورة بتتمسح لو اترفضت، أو غيّرتها (القديمة بتتمسح)، أو شلتها من «شيل صورتي»، أو اترد تمن الشراء، أو مسحت حسابك. ومش بنستخدمها في أي حاجة تانية، ولا بنعمل عليها تعرّف على الوش.

الحقوق ومصادر الصور

اللعبة فيها لقطات ثابتة من أفلام ومسلسلات ومسرحيات، مستخدمة في أسئلة التريفيا عشان تخمّن منها. معظم الأسئلة والصور عملها فريق الاستوديو، وكل لقطة منسوبة للقناة أو الشركة صاحبتها جوه اللعبة (الإعدادات ← «الحقوق ومصادر الصور») وفي صفحة المصادر على موقعنا: anubisstudio.net/p/khamsa-l3b-credits/ — وحقوقها محفوظة لأصحابها.
اللاعيبة كمان بيقدروا يضيفوا أسئلة وصور من عندهم في الباقات والمشاركات، وكل حاجة بتتراجع من الأدمن قبل ما تتنشر. الأدمن بيراجع أي صور جديدة بيضيفها اللاعيبة، ولو معندناش حقوقها بنرفضها أو بنكلّم الجهة صاحبة الحق قبل ما تتنشر. وأي محتوى يتبلّغ عنه بنراجعه.
لأصحاب الحقوق: لو انت صاحب صورة أو مشهد وعايز اسم شركتك يتكتب بشكل تاني أو عايز الصورة تتشال، ابعتلنا على support@anubisstudio.net باسم الشركة والعمل والصورة أو السؤال، وهنضيف اسمك أو نشيلها في خلال 48 ساعة كحد أقصى.

الإشعارات

دعوات الصحاب (اختياري): لو سمحت بالإشعارات، بنحفظ توكن إشعار خاص بموبايلك (Firebase Cloud Messaging) ونستخدمه بس لطلبات الصداقة ودعوات القعدة من صحابك. الإشعار فيه اسم اللي باعته وكود القعدة.
رسايل الشات (اختياري): لو إشعارات الصحاب شغالة، بنبعتلك إشعار لما حد يكلمك في شات الأوضة أو شات صاحبك وانت برا اللعبة. الإشعار فيه اسم اللي باعت وأول كلام الرسالة (أو «بعت ستيكر/فويس»)، والرسايل الكتير بتتجمع في إشعار واحد. بنعرف إنك برا اللعبة من حالة «متصل» بتاعتك، ومش بنبعت حاجة من حد انت عامله بلوك. تقدر تقفلها من الإعدادات ← «رسايل الشات».
تذكير باللعب (اختياري): بيتجدول على موبايلك نفسه ومواعيده متخزنة عليه. بيقف لوحده بعد أسبوعين من غير لعب.
تقدر تقفلهم من إعدادات اللعبة أو إعدادات الموبايل.

الإعلانات

بنستخدم Google AdMob: بانر في شاشة الانتظار، وإعلان لما اللعبة تخلص أو بين إيدين الكوتشينة والدومينو وألعاب الترابيزة على موبايل واحد (مش في نص الجولة أبدًا)، وفي ألعاب الأركيد مرة كل 3 محاولات، وإعلان عند فتح اللعبة مرة كل 10 فتحات بالكتير (مش لما تفتحها من إشعار أو لينك)، وفيديو بمكافأة لو انت اخترت تتفرج عليه. الإعلانات ممكن تيجي عن طريق شريك AdMob: Unity Ads، وبيوصله نفس اختيارك في الموافقة.
الإعلانات ممكن تبقى مخصّصة لاهتماماتك بس لو وافقت، وإلا بتبقى غير مخصّصة. على الآيفون بنسألك من خلال رسالة «السماح بالتتبع» بتاعة أبل (ATT) بعد أول جيم تخلّصه، مش أول ما تفتح اللعبة؛ ولو ما وافقتش الإعلانات بتفضل غير مخصّصة. وقبل رسالة أبل مباشرة بنعرض ملاحظة قصيرة بتشرح هي هتسأل عن إيه، بزرار «متابعة» واحد — القرار في رسالة أبل نفسها. على أندرويد، ولو القانون في بلدك بيطلب موافقة (زي أوروبا وبريطانيا)، بنعرض لك رسالة موافقة Google (UMP) قبل أي إعلان، ولو رفضت بتفضل غير مخصّصة.
لما تكون الإعلانات مخصّصة، AdMob بيستخدم معرّف الإعلانات بتاع الموبايل وبيانات التفاعل مع الإعلانات وموقع تقريبي من عنوان الـIP (مش GPS) عشان يختار الإعلان. وفي كل الأحوال AdMob ممكن يعالج بيانات تقنية زي نوع الجهاز والشبكة والتفاعل مع الإعلان عشان يعرض الإعلان ويمنع الاحتيال ويحسب الأعداد.
SDK الإعلانات (AdMob وUnity Ads) ممكن يعالج بيانات تقنية عن الأعطال والأداء، زي وقت فتح التطبيق والاستجابة، عشان تحليل أداء خدمة الإعلانات وقياسها وتحسينها. ده منفصل عن تقارير KL- اللي بتوصل للاستوديو للدعم.
تقدر تغيّر اختيارك في أي وقت: من «خصوصية الإعلانات» في إعدادات اللعبة، ومن «السماح بالتتبع» في إعدادات الآيفون، أو من إعدادات الإعلانات في جوجل على أندرويد.
الاشتراك «من غير إعلانات» بيوقف الإعلانات طول ما هو شغال.

المشتريات

كل عمليات الشراء (الكوينز، والشخصيات والإكسسوارات، والباقات، والصورة الشخصية والإطارات والشارات وباقة VIP، والاشتراك الشهري) بتتم عن طريق Google Play أو App Store. ما بيوصلناش رقم كارتك ولا أي بيانات دفع.
قبل ما نفتح أي حاجة، سيرفرنا بيتأكد من العملية مع Google أو Apple، وبنحفظ سجل المعاملة (رقم المنتج ومعرّف المعاملة وحالتها) مربوط بحسابك عشان نرجّع مشترياتك ونمنع استخدام الإيصال أكتر من مرة.
الهدايا: لما تبعت هدية، اللي بيستلمها بيشوف اسمك وشخصيتك والكلمة القصيرة اللي بتضيفها (لحد 60 حرف، وبتعدّي على نفس فلتر الشات). بنحفظ سجل الهدية (الباعت والمستلم والحاجة والوقت وطريقة الدفع) عشان نوصّلها ونتعامل مع رد الفلوس ونمنع الإساءة.

موبايل واحد = لاعب واحد

عشان نمنع التكرار والغش، اللعبة بتبعت بصمة مشفّرة باتجاه واحد (SHA-256) من معرّف الموبايل الخاص باللعبة (Android ID على أندرويد، أو رقم عشوائي متخزن في Keychain على الآيفون). مش المعرّف نفسه، ومش معرّف الإعلانات.
بنستخدمها عشان الموبايل الواحد يتحسب مرة واحدة: صاحب جديد واحد في «ادعي صاحبك»، وتقييم واحد (قلب أو لايك معكوس) لكل باقة أو لعبة، وكوينز الترحيب والزمّارات الببلاش مرة واحدة للموبايل، مهما اتعمل عليه حسابات.
البصمة بتتحفظ على سيرفرنا لمنع التحايل بس، ومش بنشاركها مع أي حد. لو مسحت حسابك، البصمة بتتفك عنه وتقييماتك بتتشال، والموبايل بيفضل متسجل إنه خد الهدايا دي عشان محدش يكررها.
وفي الحاجات دي بس (التقييم، وكوينز الترحيب والزمّارات الببلاش، و«ادعي صاحبك») بنستعين بـApple DeviceCheck على الآيفون وGoogle Play Integrity على أندرويد عشان نتأكد إن اللعبة أصلية والعدّ يفضل عادل للكل. أبل وجوجل بيردّوا علينا بنتيجة التحقق بس، وأبل بتحفظ لكل موبايل علامتين بس («خد هدية الترحيب» و«دخل كصاحب جديد») من غير أي بيانات عنك. لو التأكد مانفعش دلوقتي، اللعب شغال عادي والمكافأة بتستنى.
أكواد الهدايا (أندرويد بس): لو دخلت كود كوينز من الإعدادات ← «عندك كود هدية؟»، بنحفظ الكود ومعرّف حسابك والبصمة المشفّرة لموبايلك ووقت الاستخدام، عشان الكود يتصرف مرة واحدة لكل حساب ولكل موبايل، وبنعدّ المحاولات الغلط لفترة قصيرة. الخيار ده مش موجود على الآيفون.

عدّاد استخدام مجهول

مرة واحدة في اليوم كحد أقصى، اللعبة بتبعت لـ Anubis Studio تقرير أعداد مجهول: اسم اللعبة، ونوع النظام (Android أو iOS)، ولغة الواجهة، ورقم الإصدار، وعدد مرات الفتح والدقايق من آخر تقرير، وهل دي أول مرة في الشهر أو خالص. من غير أي معرّف ولا اسم ولا موديل الجهاز. الدولة بتتحسب كعدد من الشبكة، ومش بنحفظ عنوان IP.

نجوم الشهر (لو داخل بحسابك)

Anubis Studio بتكرّم كل شهر اللي بيلعبوا أكتر من لعبة من ألعابها بنفس حساب Google أو Apple (anubisstudio.net/stars). عشان كده — ولو إنت داخل بحساب Google أو Apple بس، مش كضيف — اللعبة بتبعت مرة واحدة في اليوم: اسم اللعبة، ووقت اللعب من آخر تقرير، والاسم اللي مستخدمه جوا اللعبة، ومعاهم رمز الدخول (ID token) بتاع اللعبة عشان السيرفر يتأكد منك.

رقم حساب Google أو Apple نفسه مابيتخزنش عندنا: السيرفر بيحوّله لمفتاح مشفّر ثابت، وده اللي بيخلينا نعرف إن اللي بيلعب في لعبتين هو نفس الشخص من غير ما نعرف حسابك. بنحتفظ بالإيميل في لوحة التحكم عشان نقدر نوصلك لو اتكرمت — مش بيظهر على الموقع ولا بيتباع ولا بيتشارك. اللي بيتنشر على الموقع: الاسم والألعاب وعدد الساعات وكلمة التكريم، وبس. اللعب كضيف مابيدخلش في ده خالص، وتقدر تطلب شيل اسمك وبياناتك في أي وقت من support@anubisstudio.net.

تقارير الأعطال وكود العطل

عشان نصلّح المشاكل بسرعة، اللعبة بتبعت تقرير تقني لما يحصل عطل أو حاجة توقفك:

اللي بيتبعت: رسالة العطل ومسار الكود التقني (stack)، وآخر الشاشات والخطوات اللي عملتها كأسماء مختصرة (زي «home» أو «create_room»)، ونوع النظام ونسخته، ونسخة اللعبة، ووقت العطل، ومعرّف حسابك المجهول.
اللي عمره ما بيتبعت: أي كلام كتبته (شات، أسئلة، أسماء)، ولا إيميلك، ولا أي إيصال أو توكن شراء.
كود العطل: أي عطل بيوقفك بيظهرلك بكود قصير (زي ⁨KL-4K7Q2X⁩) مع زرار «انسخ الكود» وزرار «تواصل مع الدعم». الكود عشوائي ومش بيدل على حد، وبنستخدمه عشان لما تبعتهولنا نلاقي العطل بعينه.
لو مفيش نت: التقرير بيفضل متخزن على موبايلك (20 تقرير بالكتير) وبيترفع أول ما النت يرجع.
بنستخدم Firebase Crashlytics (من Google) وسيرفرنا لتخزين التقارير دي. التقارير بيشوفها الاستوديو بس، وبتتشال بعد ما نصلح المشكلة.
في النسخ اللي بنجربها إحنا (debug) التقارير بتبقى مقفولة خالص.

مين بيعالج البيانات

Google Firebase (الدخول، وقاعدة البيانات، والتخزين، والإشعارات، وتقارير الأعطال، والسيرفرات) — خوادم Google ممكن تكون برا بلدك.
Google AdMob (الإعلانات): ممكن يوصله معرّف الإعلانات (بس لو سمحت)، وموقع تقريبي من عنوان الـIP، وبيانات الجهاز والشبكة، وتفاعلك مع الإعلان، عشان يعرض الإعلان ويقيسه ويمنع الاحتيال. سياسته: policies.google.com/technologies/partner-sites
Unity Ads (شريك إعلانات عن طريق AdMob): ممكن يوصله معرّف الإعلانات (بس لو سمحت)، وموقع تقريبي من عنوان الـIP، وبيانات الجهاز والشبكة، وتفاعلك مع الإعلان، عشان يعرض الإعلان ويقيسه ويمنع الاحتيال، وبيوصله نفس اختيارك في الموافقة. سياسته: unity.com/legal/privacy-policy
ممكن نضيف شركاء إعلانات تانيين في المستقبل، ونحدّث السياسة دي وقتها.
Google وApple للدخول الاختياري وللمدفوعات، ولـ Google Play Games وGame Center (الإنجازات ولوحات الترتيب).
مش بنبيع بياناتك، ومش بنشاركها مع حد تاني غير كده إلا لو القانون طلب.

الأمان

البيانات بتتنقل مشفّرة (HTTPS/TLS). قواعد الأمان في Firebase بتسمح لكل لاعب يكتب في بياناته هو بس، والعمليات الحساسة زي الكوينز والمشتريات والمراجعة بيعملها السيرفر بس.

مدة الحفظ وحذف الحساب

بنحتفظ ببيانات الحساب والمحتوى طول ما حسابك موجود.
من جوه اللعبة: الإعدادات ← «امسح حسابي وبياناتي». بنقفل الحساب وبعدين بنمسح ملفك واسم المستخدم وصحابك ومتابعاتك ورسايلك المباشرة ورسايلك في شات الغرف (ومنها المافيا والطبلية) وتسجيلاتك الصوتية وصورك وبلاغاتك وحظرك واعتذاراتك وتوكن الإشعارات والباقات اللي عملتها وطلبات المراجعة ومكانك في كل ترتيب (اليومي والشهري والشهور اللي فاتت والمستويات و«سجّل بدماغك»)، واسمك من أرشيف الماتشات، وموافقتك على شروط المحتوى وسجل فلتر الكلام بتاعك. لو كنت داخل بـ Apple بنلغي صلاحية تسجيل الدخول بـ Apple، ولو كنت داخل بـ Google أو Apple بنشيل لعبك في خمسة لعب من «نجوم الشهر» في لوحة الاستوديو وصفحته. ونفس الحاجة بالظبط لما الإدارة تمسح حساب. الإنجازات والنقط اللي اتنسخت لـ Google Play Games أو Game Center بتتمسح من إعدادات المنصة دي نفسها (حساب Play Games أو Game Center بتاعك)، لأننا مش بنقدر نوصلها.
الأسئلة اللي اتقبلت في الباقات العامة ممكن تفضل موجودة بعد ما نشيل اسمك منها. وبنحتفظ بعلامة تقنية إن الحساب اتمسح (عشان الجلسات القديمة ما ترجعش البيانات)، وسجل المعاملات والهدايا وأكواد الهدايا وسجل الإدارة بمعرّف غير مباشر من غير اسمك ولا رسايلك، لو القانون أو قواعد المتاجر طلبت، وعلامة إن الموبايل خد كوينز الترحيب أو استخدم كود هدية عشان مايتكررش.
من برا اللعبة: ابعت لـ support@anubisstudio.net من عنوان تقدر تثبت بيه ملكية الحساب، ومعاه اسم المستخدم (khamsa_#####) أو كود الصداقة، وهنمسحه في خلال 30 يوم. ما تبعتش أي كلمة سر.

الأطفال

خمسة لعب لعبة للصحاب والعيلة وفيها شات ومحتوى من اللاعبين، ومش موجهة للأطفال تحت 13 سنة، ومش بنجمع عن قصد بيانات من أطفال تحت السن ده. لو عرفت إن طفل عمل حساب، ابعتلنا ونمسحه.

إشارة السن: على الأجهزة اللي بتدعمها، بنسأل Apple (Declared Age Range) أو Google Play (Age Signals) عن نطاق سن المستخدم، زي «أقل من 13» أو «13 لـ15» أو «16 لـ17» أو «18 وأكتر»، وأحيانًا عن موافقة ولي الأمر. ده عشان نعرض تجربة مناسبة بس. لو المستخدم أقل من 13، أو محتاج موافقة ولسه مجتش، أو اترفضت، بنقفل كل حاجة أونلاين: تسجيل الدخول، والشات، والفويس، ونشر المحتوى، والقعدات المفتوحة. وبتفضل ألعاب الموبايل الواحد متاحة، والإعلانات بتبقى غير مخصصة. نطاق السن نفسه مش بيتخزن ولا بيتبعت لسيرفراتنا، واللي بيوصل السيرفر علامة بس إن الحساب عليه قيود. ولو ولي الأمر سحب موافقته، بنطبّق القيود دي تاني.

حقوقك

تقدر تطلب نسخة من بياناتك أو تصحيحها أو مسحها أو توقف استخدام معين ليها، من support@anubisstudio.net وتقدر تقفل الإشعارات والميكروفون والصور من إعدادات الموبايل في أي وقت.

تغييرات السياسة

لو غيّرنا حاجة مهمة هنا، هنحدّث التاريخ اللي فوق ونوضح التغيير جوه اللعبة أو في الصفحة دي.